Mat 12 | ASO | STEP | A'mine gameneu' nene holise' gamene mau' Izesu' izipahala zuhosi viti mingu' nivavo izipahala zuho ingine ga'namu' ngisavo viti godololati' gihile nene ili ni'mi nivavo

Matthew 12

Holiseku' Izesu' Izipahala Zuho Nete Viti Godololati' Ili Ni'mi Vani'

(Maleko' 2:23-28; Luka' 6:1-5)

1 A'mine gameneu' nene holise' gamene mau' Izesu' izipahala zuhosi viti mingu' nivavo izipahala zuho ingine ga'namu' ngisavo viti godololati' gihile nene ili ni'mi nivavo 2 Halisaio' mono' laa' ave malite ningi gili Izesu'ni ti' li li-imani': Ningezo geze izipaha zuho ingine ne'mine ani' ne'mo holise' gamene'mi lou' gamazi ma nene avuto' ikeve. 3 Ne'mine li likevo Izesu' ti' lo lo-ngimine': Davidikisi ido' ezesi monave nesi ga'na hili minani' gamenela nene avotemoti guve'inesi ve naba Davidi' ine' initekumu' nene gati gilahe gilamave. 4 Ado' O'moso'mi numungu' dizo O'moso'mi velelo' milaa' ani' beleti nene nani'. Ado' louli'mo lido' nene eveneto' medeli mini O'moso inite' lehize-daa' avelitevo' nalizado' o minine' beleti nene Davidikisi ezesi monavesi nalizado' lisihe' amine' nene nani' ve. 5 Ido' eveneto' medeli mini O'moso inite' lehize-daa' ave ingine holiseku' nene mono' numuno nabau' nene holiseku' gono damaa' ve li li huki nizanako ningi lamavo gono ha daa' nani' ma nene gati gilamani' nehe. 6 Naza ma lo-lengemeloze. Gililo. Idise mene gamenelo' lengi' vovotingu' mene gono noduvoni' ne'mo nene mono' numuno naba nene ivile' ogosa inite' naba neive. Nemu' nene eveneto' medeli mini O'moso inite' lehize-daa' ave holiseku' gono dangumu' lihime dikeve li-ngidisa'mani' ne'minisa neni' izipaha'ne zuho nene lihime dikeve li-ngidamilo. 7 Mono' godolou' O'moso'mo line' gamazi ma ti' lo neive:

Inite' ma nimi oloku' gizaa' nene lamine' neiha neni' giluvoni' nene evenekumu' mulumo'ine gelo nasahili' o-ngedaa' ne'mo ivile' o neive.
Mene gamazi'mi monovo nene gili lamine' adiniko lihime'ine nomivo minani' nemu' nene lingine lihime dikeve li-ngidamadine. 8 Lingine neni' izipaha'ne zuho nene holise'mi lou' nene avuto' ikeve li-ngidamilizado' o neive. Nanitekumu' ve. O'mosolati' ve gihile naza nene holiseli'mi meleho mino a'mine holiseku' iliza initekumu' ido' amiliza initekumu' laa' uve nene nenikovo' nouvoni' nenako nemu' ve.

Evene' Ana Goloso Ive Holiseku' Izesu' Do Lamine' O-dine' Gamazi

(Maleko' 3:1-6; Luka' 6:6-11)

9 Izesu' aza minine' ebe' nene hulo vo mono' numungu' dizine'. 10 Vo dizo ningo giline' nene evene' ma ana hela goloso ogo gilizevo o vive ma minine' nene ningine'za evene' malite Izesu'ni goni' i-diliza akamu' vise' igi ti' li longo' i-dani': Evene' holiseku' do lamine' o-ngedaa' nene gelaine' leli' louli'mo lido' nene vo do neihe. 11 Ne'mine likevo Izesu' ti' lo lo-ngimine': Lengikuti' ve mali'mo sipisipi ize hamo' ma gedekeline' a'mine nene holiseku' galeseu' lemeline' nene a'minguti' nene do hazala o-damilido' o neihe. Evene' ne'mo sipisipi ize nene ivile' ogo inite' gihile neinako 12 holiseku' do lamine' o-ngedaa' nene ha neive. 13 Ne'mine lo ana helala goloso o vive nene ti' lo lo-dine': Anga do pehe lozo. Lo-davo ana do pehe lavo helala minine' ana ne'mino lamine' ine'. 14 Lamine' ogavo Halisaio' mono' laa' ave ingine ningi heta limi vi Izesu'ni bililizani' aka di soto' ilisa mulise mili gamazi di hamo' ani'.

Izesu' Nene O'moso'mi Gonolo' Ve've Gihile ve

15 Ne'mine ani'za Izesu' aza mono' numunguti' lemo bililiza akamu' vise' igi gamazi di hamo' ani' nemu' gelo a'mine ebe' nene hulo vine'. Hulo novivo evene' muki' nene e'meti nivavo engikuti' linge ma inite' gizi dave minani' nene muki' do lamine' o-ngidine'. 16 Ne'mine ine'za eze monovomu' nene li hutile' amilizave lo ga'ine dani'. 17 Ne'mine ine' nene O'moso'mi veleti' gamazi lo soto' oga' ive Isaia' gozopo' O'moso'mo line' gamazi gizine' ma gihile izelingumu' ve losa ine'. A'mine gamazi nene ti' lo neive:

18 Naza gonolo' gipe'ne ma do kegeso ele'mize muluve nene ningilo.
Aza nene vo'nelo' gipe'ne neivo
ezemu' numo helavo lanite' goloso gelaa' nouve.
Ido' neni' Sikalahu'ne nene eito' molokuvo
evene' ato ato' muki' nene lihime'inemu' ize' molo-ngedeli gamazi nene
lo soto' ogo lo-ngemeleseive.
19 Aza nene lovo gamaziuti' geke' lo lamo
akalo' nevo gamazi nabauti' lamoloseive.
20 Ido' aza evene' ma monovo'ine goloso ogavo
gepe' ma mange mange si'zo lemo ongalosa minine' ne'mine
igi limi ingalisa minani' nene
do lemo ongo-ngedo do goloso ma o-ngedamoloseive.
Ido' evene' ma mono'ine mo osu' lolosa neivo
lamu viki ma lihizelesa veveze' ogo minine' ne'mine igi minani' nene
mono'ine do osu' lo-ngedo do goloso ma o-ngedamoloseive.
Aka've hizi tili-dilizani' inite' muki' nene
ngivile' ogo gono do do vo evene' ize' molo-ngedo
inite' goloso o vine' muki' nene do lisihe' ogo do peleleseive.
21 Ne'mine ogo neivo
evene' ato ato' neze evene'ne zuho olihe lolo' amave ingine
eze emeni damenimu' gili lele'mize lamine' oloseive li
gili ele'vole' igi gizebo minilisave line'.

Izesu' Nene Belezebulodati' Amuzo Do Minosa Gono Nodave Langumu' Izesu' Aza Ne'mino Nomive Lo Lo-ngimine' Gamazi

(Maleko' 3:20-30; Luka' 11:14-23)

22 Ne gamenela nene evene' ma sikalahu' golosoli'mo lulou' mino vele do like-do vele hize langolo' o-davo gamazi lamive ma Izesuda ele'mizi ikevo do lamine' o-davo a'mine ve nene gamazi laa' ido' vele ningaa' ine'. 23 Ne'mine ogavo evene' muki' a'mido' minave ingine nene ningi gopo ga'ine gili ti' li lani': Zuda ve leli' avotemoti guve'inesi ve naba Davidi' a'vopilemo' ezelo' medelo guvelesi ve naba lolo' ilive lani' ma nene nolihee. 24 Ne'mine lani'za Halisaio' mono' laa' ave ingine gili ti' li lani': O've. Ve mene sikalahu' goloso do nohuline' nene a'mine sikalahu' golosoliti guve'inesi ve naba Belezebulo' ne'mo amuzo imidotikovo' do nohuline' ve. 25 Ne'mine likevo Izesu' aza lu'ningu' gamazi gili minani' nene ningo gelo ti' lo lo-ngimine': Misubo mau' aleve ingine nene hizi ho'li mini lovo hizilizani' nene mo evene' sime' nikevo ebe' nene ga'me pizeleseive. Ido' ebe' naba mauti' nehe numuno ngomo mauti' nehe evene' hamo' zuho ingine ho'li vi eza ema vilizani' ingine nene ele'vole' igi minami gopo'napa ilisave. 26 Ido' Satani ne'mo eze zuho ngimiselo do huli-diniko azasi eze zuhosi ho'li mini ngelami di'mozi vi gopo' napa adine. 27 Ido' nenikumu' nene Belezebulodati' amuzo dosa sikalahu' goloso nene ngimiselo do nohulive nilahe. Ido' lengi' zuholite sikalahu' goloso ngimiseli hulaa' ani' ma nene amuzo zahidati' disa neve. Lingine engikumu' nene Belezebulodati' amuzo disa sikalahu' goloso nene ngimiseli nihulave li ma li-ngidadiniko lengi' nene di gonito' i-lingidadine. O'ove. Ingine Belezebulodati' amuzo damaa' ani' ne'mino nazasi ezelati' damo O'mosolatikovo' amuzo daa' nouve. 28 Ido' ne'mine oga' nouvoni' nene O'moso'mi Sikalahu' ne'mo nele'mize aka ivo sikalahu' goloso ngimisele hulaa' nooloni' nene O'moso'mo evene'velo' gizebo ogo amuzo've nene do soto' ogo nolengelebizive. 29 Evene' mali'mo ve ma gasava daa' ive mineliveli'mi numu'veu' dizo a'mine gasava daa' ive'mo gizebo ogo minine' inite've ipe' ogo daline' nene haza dizo ipe' ogo damoloseive. Asi a'mine gasava daa' ive nene gomu' ivile' ogo nala' do-mikosavo' nene dizo inite've ipe' ogo daloseive. A'mine'mine ogo naza nene Satani ivile' ogosa evene' eitati' nene do nenita oga' nouve. 30 Ido' ve ma ingine nenita gi'mizi minamave nene neni' lovo i nimaa' ave nene nizave. Ido' ve ma ingine nenikisi maka' mino evene' do nenita amunive nene evene' ngimiseli di hutile' i huli-ngidaa' nave. 31 Nemu' nene lo-lengemeloze. Gililo. Evene' ingine goloso inite' ato ato' iga' ani' ne'mi lihime ido' O'mosomu' ido' evenekumu' divi ledivi' iga' ani' ne'mi lihime nene O'moso'mo ha hulo-ngedeleseiha O'moso'mi Sikalahu' divi ledivika ma i-dilizani' nene lihimetine mo keke' hulo-lengedamoloseive. 32 Ee, ve ma ingine gamazi goloso li O'mosolati' ve gihile neni' divi ledivika li-nidilizani' lihime nene O'moso'mo ha hulo-ngedeleseiha gamazi goloso li O'moso'mi Sikalahu' divi ledivika li-dilizani' lihime nene apase-ngedamivo alinge' gamene nabau' lihime'ine apase-ngedo goni' o-ngedeli gameneu' nesi ha minivo mine do vo mineleseive.

Ogo Molo Oga' Noune' Ne'mo Monovote Do Soto Oga' Neive.

(Luka' 6:43-45)

33 Evene' ingine za nene lamine' nolihe goloso nolihe nene zali'mi gihile'veloti' nene lubamu ningi gililisave. Nemu' nene za mali'mo goloso noline' nene gihile'vesi goloso mineleseive. Ido' za mali'mo lamine' noline' nene gihile'vesi lamine' mineleseive. Ido' eveneliti monovo nene a'mine'mine ogo ningo gelelesane. 34 Lingine Satali'mi izipahala zuho nene nizave. Evene' lu'ningu' go'zikani' inite' nene ve'ninguti' li hulaa' nanako lingine lutingu' golososi minivo nizani' nete gamazi lamine' nene ngeli mo lamilisave. 35 Evene' lamine' ne'mi lulou' nene gamazi lamineli'mo vai' lo neinako ne'mo nene monovo lamine' do soto' oga' neive. Ido' evene' goloso ne'mi lulou' nene gamazi goloso ne'mo vai' lo neinako ne'mo nene monovo goloso do soto' oga' neive. 36 Ido' ma lo-lengemeloze. Gililo. Gamazi goloso gidini muki' nene haza gamazi nehe li gopo ma li nilizani' nene a'minemu' O'moso'mo gamene nabalo' goni' o-ngedo longo' o-ngedavo evene' muki' a'mine lani' gamazi nene li soto' ikevo ne'mi lihime ngemeleseive. 37 Gei' gamazika liline' ne'mo ogo molo iline' monovoka nene do soto' ogavo lamine' o noline' nene ve lisihe' ve lo O'moso'mo lo-gedeleseive. Ido' goloso o noline' nene ve goloso ve lo-gedo lihime gemeleseive.

Evene' Golosolite Ele'vole' Suno Nodanivo Ningelone Li Izesu'nimu' Lani'.

(Maleko' 8:11-12; Luka' 11:29-32)

38 Ne'mine lo lo-ngemavo mono' monovo apizi ngimaa' ave ido' Halisaio' mono' laa' ave linge ingine gamazi ti' li li-imani': Tisazo, gaza O'moso'mo amuzo gimine' nene lelebizo atoli'mine suno ma do soto' oganivo ningelone. 39 Likevo Izesu' aza ti' lo lo-ngimine': Mene gamenelo' nizave lingine evene' golosovo' mini vene' ma va'ningine huli ve gohi malo' vi lihime daa' nani' ne'mine igi O'mosotine huli lihime daa' nave. Lingine nenikumu' atoli'mine suno do soto' ogo O'moso'mo amuzo nimine' nene lengelebizelongumu' nilani'za ma lengelebizamolosuve. O'moso'mo gozopo' eze veleti' gamazi lo soto' oga' ive Zonada inite' do soto' ogo amuzo've ngelebizine' ne'mine inite' ma nenita soto' ogavo nevo' ningilisave. 40 A'mine ningilizani' inite' nene ne'mino neive: Zona'ni nene alaha' nabali'mo do mikile' ogavo ne'mi gatunou' gamene sitohamo minine' ne'mino O'mosolati' ve gihile naza nene misubo'mi lulou' gamene sitohamo minelesuve. 41 Ido' Nineve aleve ingine Zona' mono' gamazi lo-ngimine' nene gilii lu'ine di velepe' izani'za lingine gili' nalo. Naza Zona'ni ivile' ogo minuve mene ogo lengi' vovotingu' mela soto' ogo mino gamazi lo-lingimuvodo' nene gili lutine di velepe' izamanako gamene nabala nene Nineve aleve nete oti lengi' lihimetine li soto' i-lingidi gonito' lengele'mize milalisave. 42 Ido' guvelesi vene' naba aza emala misubo monovo liginela gizebo o minine' misubo Seba nene hulo avotemoti guve'inesi ve naba Solomoni' laa' ine' gamazi lamine' nene gelelesa aka ha'na ha'na goloso ani'za neni' nene Solomoni'ni ivile' ogo mino mela lengi' vovotingu' soto' ogo mino gamazi lamine' noluvoni' nene lingine gilisa'mave. Nemu' nene gamene nabala a'mine guvelesi vene' naba ne'mo nene oto lihimetine lo soto' ogo goni' o-lengedeleseive.

Sikalahu' Goloso Eveneliti Lu'ninguti' Vikevo A'mida Lite' Li O'moso'mi Sikalahu' Ele'mizi Milamilizani' Nene Mo Ihe' Goloso Gehepeve Ilisave Lo Izesu' Line' Gamazi

(Luka' 11:24-26)

43 Sikalahu' goloso mali'mo ve mali'mi lulou' mininguti' hulo-do viline' nene mine gelo mineline' ebekumu' nene ebe' gokota viseto' voloseive. Vise' iline'za ma ningamiline' nene 44 ti' lo loloseive: Naza gana' hulo uvoni' numu'nela tine' molo volove. Ne'mine lo tine' molo ogo ningeline' nene pipia' gisi di lisihe' ikeni' neiha a'mingu' evene' ma ingamani' neivo ningeleseive. 45 Ningo gohi vo sikalahu' goloso seveni eze ivile' igi goloso naba gehepeve minani' nene ngele'mizo ogavo a'mingu' dizi a'mine ve'mi lulo nene ingine numu'ine lolo' ogavo minilizani' nene gomu' a'mine ve minaa' ine' nesi ivile' ogosa goloso nabalo' mine molo mineleseive. Ido' ne'mine monovo nene lingine ve goloso idise nizani' aleve lengita soto' oloseive losa noluve.

Izesu' Neida Izelehosi Nakunolo Zuhosi Ani'

(Maleko' 3:31-35; Luka' 8:19-21)

46 Izesu' aza di gese' ave muki' nene gamazi ha lo-ngemo neivo izeleho ido' akunolo zuho ingine gamazi li-imilisa igi heta oti minani'. 47 Igi oti nizavo ve mali'mo ti' lo lo-imine': Gelezo. Izaho ido' nakuna zuho ingine gamazi lo-gemelone li heta home igi oti nizave. 48 Ne'mine lavo Izesu' ti' lo lo-imine': Ize'nehinemukisi ido' naku'nemotinemukisi nolabe. Nemu' naza lolove. 49 Ne'mine lo e'meti monani' alevela nene ana hisu' noogo ti' lo line': Ize'nemote naku'nemote nene mene nizani' ve. Nene nanitekumu' noluve. Okulumoku' me'nehi lulolo' igi mili iga' nave engi' nene ize'nemote naku'nemote ne nizani' nenako nemu' nene noluve.